慢速粤语听力：“靠实力说话”也有错？

喺欧美社会，好多人觉得不平等问题嘅根源，系成个社会机制嘅透明性同流动性仲唔够，有好多人就算有天赋又努力，但仲系会有天花板嘅问题。因为欧美社会嘅上层结构紧紧掌握喺一啲权势阶层同精英阶层手里面。

一般人认为不平等问题嘅核心系一个人嘅背景同钱可以提供不平等嘅优势，而要解决呢个问题，就要创造一个靠个人实力讲话嘅环境。

但系耶鲁法学院嘅马科维茨教授认为“靠实力讲话”会令不平等嘅问题更加严重。

凡事靠实力，唔靠关系，好似系一个好公平嘅机制。但系呢种机制创造咗咁样一种竞争：就算每个人都按照规则竞争，最后都系有钱人赢。

例如喺美国嘅常青藤大学，佢哋开始嗰时，只系录取一啲有地位嘅人嘅仔女或者一啲校友嘅仔女。呢个机制肯定唔系一个平等嘅机制。

喺六十年代嗰时，佢哋开始按照学生嘅能力嚟录取。呢个制度似乎可以促进教育嘅公平。

呢个制度发展咗六十年，大学嘅不平等问题并冇得到解决，反而更加严重。

有数据显示，年收入超过二十万美金嘅美国家庭，佢哋嘅仔女嘅高考成绩，比年收入四万到五万美金家庭嘅仔女，高百分之十。

原因你应该都估得到，就系有钱人可以帮自己嘅仔女投入更加多嘅资源。

好似，有钱人嘅家庭可以请一个好贵嘅家教帮佢嘅仔女准备高考。

虽然喺呢个制度入面，赢嘅喺有钱人，但系其实佢哋嘅生活压力都好大。

因为按照游戏规则，如果你想做最犀利嘅嗰啲人，咁你就要付出超乎寻常嘅努力，而且呢种压力会从学校一直延伸到职场。

有调查表明，喺美国精英学校嘅学生，有焦虑症同抑郁症嘅概率，系同龄人嘅三倍。最夸张嘅调查系，系硅谷嘅高中，超过一半嘅学生都有轻微嘅抑郁症，超过百分之八十嘅学生都有焦虑嘅症状。

而喺职场，呢种压力就会带嚟超时工作，即系加班。

例如喺美国嘅法律界。喺六十年代，每个律师一年嘅工作时长系大概一千三百个钟，而到咗两千年，如果你想成为一个律师事务所嘅合伙人，你就要每年投入两千四百个钟。两千四百个钟，即系从朝早九点做到夜晚九点，一个星期上六日班。

咁有冇方法可以解决“靠实力讲话”呢个制度带嚟嘅问题呢？

耶鲁大学嘅教授提出咗两条建议。

第一、要开放教育嘅机会，令更加多人接受“还唔错”嘅教育，而唔系过度强调“顶尖教育”。咁样嘅话，你可唔可以爬到一条梯嘅顶端就唔再系咁重要嘅事。所以为学生同家长减少咗升学嘅压力。

第二、多啲鼓励嗰啲唔需要特别复杂嘅培训或者好高学位证书就可以做嘅工作。

好似系健康领域，有好多公司同医疗机构，都投入大量嘅精力研发高科技嘅治疗方式，要求从业人员要有顶尖嘅教育背景。

但系教授认为，我哋应该做嘅，系扩大预防性嘅工作，提升公共健康嘅教育。

呢类工作有护士嘅教育背景就得啦。

总结一下今日讲嘅嘢，耶鲁大学嘅马科维茨教授认为，喺美国靠实力讲话嘅文化，本来系一个解决社会不平等嘅方案，但系喺一啲方面，佢反而固化咗美国嘅社会阶层。

在微信搜索我要学广东话，就可以找到我的微信公众号了，最新的音频会先在微信更新哦。