广播专辑 弄堂茄山胡246 漫步杨浦滨江

漫步杨浦滨江  
 
徐鸣  
 
　　老话讲：一朝拨蛇咬十年怕井绳。2012年黄金周高速公路第一次实行免费通过，平常勿欢喜凑热闹个我，却神经搭错脱了，跟仔旅行社出去白相，结果高速公路浪超级堵，等到大巴开到目的地，已经是夜里向了，只好汏汏就困。三日游缩水，其中一日天辰光来勒大巴上头数车子。

　　后来我吸取教训了，黄金周蹲辣屋里向，勿到热门个旅游胜地摩肩接踵看人头，专门寻冷僻点个景点，笃悠悠白相。所以今年当我从夜报浪向看到杨浦滨江（南段）建成对外开放时，便趁国庆期间，跑去见识一番。

　　吃好中饭，手机掼辣拉屋里向，出门乘公交车来到杨树浦路1056号，从丹东路轮船摆渡口旁边个入口，踏进濒临黄浦江的渔人码头。搿搭里原来是“上海第一毛条厂”跟“上海水产品批发市场”所在地。

　　讲起上海第一毛条厂，我来辣纺织局工作，老熟悉个。1915年，怡和洋行集资150万两白银，创办了“英商新怡和纱厂”，也叫杨树浦纱厂。1941年太平洋战争爆发后，一度成为侵华日军个军工厂。1954年由人民政府接管，改名“公私合营上海裕华棉毛麻纺织厂”。1966年，更名为“国营上海第一毛条厂”。2009年渔人码头工程启动，厂房大面积拆除，从此同怡和纱厂历史再会。

　　江上吹来微风，空气中带点湿润，游客仅三三两两。我沿着江边亲水平台慢慢散步，望望黄浦江对岸高楼林立；听听母亲河水拍打驳岸涛声阵阵。呒没走多远，一大片斜坡缓缓伸向岸上高地。4个姿态勿一个扛大包码头工人个铁艺雕塑，矗立辣斜坡边浪，既形象又生动还原了历史情景。当年怡和纱厂纺纱用个棉花跟羊毛，全部靠中国人从船浪一包包背下来，老重老辛苦个。斜坡正中，倒三角整齐排列着14只拴缆绳用个桩墩头。过去搿搭要停泊勿少装卸水产品个船只，因此辣岸浪就得配备相应数量个桩头。设计师巧妙个拿搿些桩墩头侪收集起来，集中放辣拉一道，起到了特殊个视觉效果。有几个游客还以为是供人休憩个凳子，纷纷坐上去体验一记。

　　“有限介入，尽量原真性保留工业遗存”，搿个是开发杨浦滨江个基本理念。只要有心，一路浪都可以勿断惊奇个发现原来工业历史印记，如粗骨料水门汀地坪、灯塔基础、排风管道、行车铁轨、吊车底座、车间墙面上刷个宣传标语等等，甚至连江边防汛墙浪个栏杆、路灯电线杆、垃圾桶，均是采用工业管道脱仔高压容器形状设计，以此向“百年杨浦工业”致敬，并告诉游客搿搭曾经个辉煌。

　　我兜兜、看看、歇歇、摸摸、问问、记记，等荡到杨树浦水厂围墙边，约4里路长个渔人码头二期到此为止。整个毛条一厂，摇身一变杨浦滨江12景：伴林浦舍、台地草径、最美夕阳、海港起航、纺织记忆、望江引渡、芦池杉径、纱厂廊架、草海遗构、海港再现、江畔广场跟趸船印迹。唯一保留下来个建筑是邻近杨树浦水厂个一幢老洋房。迭幢白色水磨石外墙面个英国乡村别墅，早年是该厂英国老板个住宅。解放后做过厂里个疗养所。据怀德路出入口一位保安透露，今后迭搭将成为文化展示馆告游客中心。

　　围绕着老洋房，是一排花园式廊架，廊架周遭是一片长满芦苇个湿地，中央有1个池塘，盛开睡莲。池塘上铺设红褐色金属格栅板。搿些金属板上，每隔一段就会镂空镌刻一些字体，我仔细打量，才知晓是上海毛条一厂各个重要历史阶段个记录。

　　啥个叫时尚？简单点讲，时尚就是领先大众。趁杨浦滨江还呒没热起来，快点去搿面搭慢跑、看书、写生、拍照、跳舞、打拳、嬉闹、吹牛、怀旧，或者啥也勿做，两只眼乌子盯牢天上云彩，辣簇新个滨江边发发呆，一样别有味道。