慢速粤语听力：如何让自己满足？

00:0007:33

油管上面有一个好有趣嘅频道，

佢嘅名叫Kurzgesagt - in a nutshell

呢个频道会用好有趣嘅卡通讲解一啲复杂嘅问题，

我最近睇咗一个视频，

佢嘅名系《不满足嘅解药》。

人嘅欲望总系无穷无尽嘅，

点样可以满足一个人嘅欲望？

呢个视频提供嘅方法系学识感恩。

知道感恩嘅人会生活得更加快乐，更加满足。

下面我会复述呢个视频，

如果你有兴趣嘅话，

就继续听落去啦。

好多人对佢哋嘅生活感到不满，

总系觉得生活中有好多唔好嘅地方，

例如佢哋觉得自己嘅钱唔够多，

所以佢哋就努力揾钱，

当佢哋揾到更多钱之后，

佢哋还系觉得唔满足，

佢哋需要更加多嘅钱。

其实为咗令自己满足而不断追求系一个陷阱，

你永远都唔会觉得满足。

令自己满足嘅解药并唔系不断去追求自己想要嘅嘢，

而系学识感恩自己已经拥有嘅嘢，

而且对呢个世界俾你嘅小小善意而感恩。

研究表明，识感恩嘅人生活得更加快乐，

更加满足。

知足常乐呢个道理我哋好早就听过，

但系真系可以做到知足常乐嘅人好少。

我细个嗰时，我妈妈都成日同我讲知足常乐，

但系我觉得我理解嘅知足常乐同我妈妈理解嘅唔一样。

我妈妈觉得知足常乐系可以放松自己，

唔使咁辛苦去追求一啲嘢，

随遇而安。

但系对我嚟讲，

知足常乐系一种心态，

意思系珍惜拥有嘅嘢，感恩拥有嘅嘢。

不断追求并唔系为咗令自己满足，

而系为咗令生命更加有意义。

感恩呢两个字真系好简单，

但系真系可以做到感恩呢种状态其实唔容易。

有一句名言系咁样讲嘅，

呢个世界唔系缺少美，

而系缺少发现美嘅眼睛。

同样，

呢个世界唔系缺少爱，

而系缺少感恩嘅心。

如果一个人常有感恩嘅心，

就会明白，

自己并唔系全世界最可怜嘅人，

可以拥有自己宜家有嘅呢一切，

其实系好幸运嘅，

可以出生喺一个和平嘅年代，

住喺一个还算现代嘅城市，

有一两个真心关心自己嘅人，

还可以独立生存，

已经比呢个世界上好多苦苦挣扎嘅人幸运好多。

因为仲有好多人，

成长环境差过我哋，

苦苦挣扎只系为咗生存。

你可以有宜家嘅一切，

其实唔完全系你自己嘅努力，

系你嘅幸运，

仲有你人生中遇到嘅种种帮助，

再加上你自己嘅努力，

先会有宜家嘅一切。

睇到呢一点之后，

虽然你拥有嘅嘢并冇比之前多。

你系唔系仲系觉得自己比之前幸福咗少少？

其实你唔需要拥有更加多嘅嘢，

你只系需要令自己睇到更加多自己以前忽略咗嘅嘢。

点样先可以令自己成为一个识感恩嘅人？

呢个视频为我哋提供咗一个方法。

每日用五分钟写低一啲你觉得值得感谢嘅嘢。

呢个方法好简单，

但系非常有效。

我哋嘅大脑系可塑嘅。

如果你不断锻炼你嘅大脑学习感恩，

只要你不断坚持，

你嘅大脑就会变成一个识感恩嘅大脑。

我发现将你嘅谂法写低呢件事系好有意义嘅，

因为当你写嘢嗰时，

你嘅大脑会强化呢种谂法。

你要感谢嘅嘢可以好细，

例如你今日去买手抓饼，

煎饼阿姨俾多啲番茄酱你。

又例如你过马路嗰时，

汽车停低俾你过先。

又例如你摸摸裤带，里面竟然有钱。

当你将自己注意力放喺值得感谢嘅嘢上面嗰时，

你嘅大脑就会变得更加识感恩。

只要你每日不断练习，

你嘅大脑就可以更敏感咁识别到生活中嘅爱同善良，

咁样你就会变得更加满足同幸福。

我先写低五个我觉得我想感谢嘅嘢：

 百合花开咗，成间房都好香；

我谂紧要唔要自己斩白切鸡嗰时，我妈妈翻到屋企，拯救咗我；

我嘅衫袋有四条锁匙，我抽咗第一条出嚟，就可以开到门，真系好彩；

打开热水壶，发现入面嘅热水仲好热；

喺冬天嗰时睇到金黄色嘅阳光，觉得自己成个世界都充满咗温暖。

写完呢啲嘢之后，

我真系觉得我嘅世界好咗啲喔。

唔信嘅话，你自己宜家试下，

罗出一支笔同一张纸，

写低五个你觉得好窝心嘅嘢。

如果你中意我嘅文章，欢迎关注我嘅微信公众号“我要学广东话”。