慢速粤语听力：善良一点

韩国女艺人崔雪莉前几日过咗身，

佢因为抑郁症，

喺屋企自杀。

其实佢唔系自杀，

佢系俾社会嘅恶意谋杀嘅。

佢过身之前，

媒体同网民曲解佢嘅言行，

佢过身之后，媒体同网民先开始爱呢个女仔。

忧郁症系一个好常见嘅病，

其实喺我哋嘅身边有好多人都有唔同程度嘅忧郁，

喺你身边哈哈大笑嘅同事，

都有可能喺深夜独自流泪。

有啲人觉得忧郁系心灵脆弱嘅表现，

的确，我都觉得忧郁系心灵脆弱嘅表现，

但系忧郁并唔系失败嘅表现，

世界上有好多成功嘅人都有忧郁症。

好似朴树、郑秀文、薛之谦、崔永元。

佢哋系成功嘅同时，

亦都饱受忧郁嘅折磨。

人会有忧郁症，

系因为佢哋嘅生命里面出现咗难以解决嘅问题，

唔系因为佢哋软弱。

冇人系铁人，

每个人都会有心灵脆弱嘅时候。

心灵脆弱嗰时，

一啲啲嘅恶意就可以摧毁一个人。

而你嘅一啲善意，

话唔定，就可以俾到佢巨大嘅温暖。

崔雪莉嘅事令我谂起好多年前睇到嘅一个视频，

一个澳洲嘅细路仔好中意整熊仔，

我开始以为呢个系佢嘅爱好，

觉得佢嘅父母好开明，

跟住细路仔话，

佢第一次整熊仔，

系因为佢嘅爸爸得咗癌症，

佢觉得熊仔可以令爸爸冇咁痛苦，

所以佢整咗只熊仔送俾爸爸，

后来佢爸爸好翻。

佢觉得熊仔可以为人带嚟安慰同幸运，

所以佢就开始不断咁整熊仔送俾其他病人。

好多病人收到呢个细路仔送嘅熊仔之后喊咗，

佢哋话，呢个熊仔令佢哋觉得呢个世界冇咁灰暗。

睇完呢个视频之后，

我忽然之后感受到非常强烈嘅善意。

其实唔系熊仔为病人带嚟咗安慰，

而系细路仔关心人嘅举动安慰咗呢啲病人。

细路仔嘅爱令佢哋相信呢个世界冇抛弃佢哋，

佢哋唔系孤立无援嘅。

其实俾善意温暖嘅唔单止系嗰啲收到熊仔嘅病人，

整熊仔嘅细路仔亦都收到咗社会嘅善意。

佢嘅父母俾咗好多善意佢，

佢嘅父母并冇因为佢系男仔，

就唔准佢整熊仔，

呢个节目嘅主持人，

并冇因为佢整熊仔笑佢，

反而俾佢感动咗，仲好支持佢。

所谓嘅善意，

我觉得就系包容。

对同自己唔一样嘅嘢保持宽容嘅态度。

如果冇父母同社会嘅包容，

呢个细路仔系冇可能做到呢件事㗎。

前嗰排，

英国嘅小王子乔治上咗新闻，

因为一个主持人笑佢中意跳芭蕾舞，

主持人觉得跳舞系女人嘅嘢，

男人，尤其系作为一个王子，

唔应该中意跳舞。

有好多人就企出嚟支持小王子。

我忽然感受到好强烈嘅善意。

细路仔中意一样嘢本身系冇错嘅，

佢哋唔应该因为自己中意嘅嘢而俾人歧视。

崔雪莉生前想勇敢做自己，

但系因为俾人误解患上咗抑郁症，

最后喺二十五岁结束自己嘅生命。

假如崔雪莉生活嘅社会多一啲善意，

多啲人包容佢嘅唔一样，

少啲人曲解佢嘅行为。

佢可能唔会咁心灰意冷，

咁决绝咁离开呢个世界。

有时候，将一个人逼上绝路嘅可能唔系自己嘅弱小，

而系社会嘅无情同冷漠。

我哋都应该做一个心灵强大嘅人，

但系其实每个人都会心灵脆弱嘅时候，

心灵脆弱并唔可耻，

心灵脆弱只系一种状态，

并唔系一种品质，

如果你感觉你嘅心灵变得脆弱，

呢个时候一定要主动求助，

千奇唔好觉得唔好意思，

一个人默默去承受，

主动求助，先系努力解决问题嘅表现。

如果你嘅朋友主动向你求助，

希望你可以多一啲善意，

因为你嘅倾听、你嘅帮助，

好可能可以将佢从水深火热之中救翻出嚟。

锦上添花易，

雪中送碳难。

希望你多一啲善意，

希望你都可以遇到多一啲嘅善意。

你可能想看：

小男孩3年制作1000只小熊，感动了三千万人

http://mini.eastday.com/mobile/180225175653066.html#